Къув-аьс къаувкунни ссавний ттуруллал,
Къурагьсса аьрщарайн гъарал щин рут1лай.-
Адагьа дурккунни ссавния увк1нал,
Зунттавун шадлугърал зарзала рут1лай.

Аврав, зунттал къарчигъай!
Зана ивк1ссарав, Мусай?
Гюргу т1ий дур ххяллура,
Ина увк1шиву буслай.

Цими ссавнийх ссур бував
Вила няк1 ц1арал жами?
Лавсун увк1рав ссайгъатран
Иттав ц1урттари чани?

Цими барз хьуссар вил ссавдакъулуву,
Дак1нил таргру курма, лах1зарду ккалай,
К1ушиву духларгсса базурдал къюву
Бюхъулул мух1улттай, бас дурну, дах1лай?

Архния урувгний, няк1сса шар кунна,
Авурди т1ар Аьрщи зиярат банну,
Ятинсса Аьрщарах уруглай уна,
Цимил дуцав, Мусай, лакку макьанну?

Ца бази дакъасса х1алт1илий кунма,
Шаврурдайх ппив хьумий, зана та хьунну?
Цамур дунияллий зун лавгмагума
Зана ивк1уннихха, ц1агу ляркъуну?

Аврав, зунттал къарчигъай!
Зана ивк1ссарав, Мусай?
Гюргу т1ий дур ххяллура,
Ина увк1шиву буслай.

Цими ссавнийх ссур бував
Вила няк1 ц1арал жами?
Лавсун увк1рав ссайгъатран
Иттав ц1урттари чани?

Автор: Магомед-Загид Аминов